Puntu Morea egongo da Musika Plazan San Pelaiotan

Puntu Morearen helburu nagusiak dira jaietan genero-indarkeriaren aurkako espazio segurua eskaintzea; eta herritarren sexu- eta genero-aniztasunarekiko begirada aberastea modu hurbil eta informalean.

Jai giroan alkoholaren eta bestelako kontsumoen eraginez desinhibizioa handitzen da, eta horrek emakumeen aurkako erasoak, LGTBIAQ+fobia edo arrazakeria kasuak areagotzeko arriskua ekar dezake.

Egoera horren aurrean, Puntu Morean egongo den Samurrak Aniztasuneko profesional taldeak prebentzioan, sentsibilizazioan eta laguntzan oinarritutako zerbitzu espezializatua eskainiko du. Berdintasunean eta sexologian adituak diren profesionalek sexualitate osasungarri, positibo eta inklusiboaren inguruko sentsibilizazio-lana egiten baitute. Horretarako, jarduera parte-hartzaileak eta material didaktikoak erabiltzen dituzte, herritarren artean oraindik ere indarrean dauden mito eta aurreiritziak deseraikitzeko eta sexu-hezkuntza modu erakargarri eta hurbilean lantzeko. Honekin batera, Puntu Morean sumisio kimikoaren aurkako eskumuturrekoak ere banatuko dira.

Puntu Moreaz aparte, errespetuzko jaien dekalogoa banatu dugu herriko tabernetan.

Ekimen hauen bidez, Zarauzko Udalak jai seguruagoak, parekideagoak eta aniztasunarekiko errespetutsuagoak sustatu nahi ditu.