IV. Zarauzko Emakume* Sortzaileen Erakusketa abuztuaren 29an

Ekimenaren helburua emakume sortzaileen lana eta sorkuntzak ikusaraztea, aitortzea eta balioan jartzea da. Horretarako, erakusketak beren proiektuak eta artisau-lanak herritarren aurrean ezagutarazteko eta partekatzeko espazioa eskainiko die parte-hartzaileei.

Aurtengo edizioan, 16 emakumeren sorkuntzak ezagutzeko eta haietaz gozatzeko aukera izango da, askotariko diziplinetan: pintura eta bestelako artelanak, ehun margotuak, liburugintza, makramea, kandelagintza, panpinak, bitxiak, argazkigintza, joskintza, collageak eta egurrezko kutxak, besteak beste.

Gainera, 17:00etan, familia eta haurrei zuzendutako liburuxka artisaua sortzeko tailerra egingo da. Tailerra doakoa izango da eta gutxi gorabehera bi orduko iraupena izango du. 8 urtetik beherako haurrek guraso edo tutore batekin parte hartu beharko dute.

Tailerra irekia izango da, plazak bete arte, eta aurrez izena emateko aukera ere izango da estekan.